بجناب امام حسن علیہ السلام



رَو میں ہے توسنِ سلامِ حسنؑ

دیکھ منہ میں رہے زمامِ حسنؑ

بہرِ ترویح اک چہکتا سخن

اے طیورِ بلند بامِ حسنؑ

ابرِ بارانِ ذکر! کھُل کے برس

اے لبِ گنگ! کھُل بنامِ حسنؑ

شام کی طرح ہولے ہولے اُتر

بخش اک کنز تن سلامِ حسنؑ

سطر در سطر رنگ دکھلائے

ہر روش ہر سخن پیامِ حسنؑ

!کرم، اے ربِّ کعبۂ احمدؐ

سببِ فاطمہؑ، بنامِ حسنؑ

آسمانِ دیارِ علم کھُلا

زیبِ منبر ہوئے امامِ حسنؑ

کس قدر تیز تھا سمِ قاتل

پڑ گیا سبز رنگِ جامِ حسنؑ

عشق آوردہ، عشق پروردہ

اک سلام اور لکھ بنامِ حسنؑ

¡

رہے پیشِ نظر مقامِ حسنؑ

سرِ تسلیم! احترامِ حسنؑ

دیکھ اے موجۂ غزالِ غزل

سرِ دشتِ سخن، خرامِ حسنؑ

قبلۂ اہلِ دین و دانائی

کعبۂ اہلِ فن، خیامِ حسنؑ

دلِ تیرہ نگاہ کیا جانیں؟

کیا ستارہ بدن تھی شامِ حسنؑ

رات، زلفِ سیہ کا اک سایہ

صبح، اک رنگِ ابتسامِ حسنؑ

گردِ سجّادۂ حسنؑ، دُنیا

دین، پیرایۂ خرامِ حسنؑ

زندگی، قریۂ رکوع و سجود

کربلا، عرصۂ قیامِ حسنؑ

!دین، دل! دین، جان! دین، جسد

دیکھنا، شانِ التزامِ حسنؑ

!چھلک، آبِ حیاتِ دانائی

رگ و پے میں اُتر بنامِ حسنؑ

جرعہ جرعہ اُتر رگ و پے میں

سیر ہو جائیں تشنہ کامِ حسنؑ

نورِ طاق و رواقِ بیتِ رسولؐ

حلقۂ باب، احتشامِ حسنؑ

قدِ سروِ چراغِ بیتِ بتولؑ

سایۂ قامتِ امامِ حسنؑ






مصنف کے بارے میں


...

خالد احمد

1944 - 2013 |


خالد احمد




Comments