اسی ہمارے دل رائگاں کی بات ہے یہ



اسی ہمارے دل رائگاں کی بات ہے یہ
کبھی یہ پھول کھلا تھا،خزاں کی بات ہے یہ

یہ حال ہے کہ جو دیوار پر لکھی ہے وہ بات
کہیں تو لوگ کہیں گے کہاں کی بات ہے یہ

سنا ہے دوست ہمیں یاد کرتے پائے گئے
یقیں نہیں، تو کسی خوش گماں کی بات ہے یہ؟

کشادہ راستے، خوش لوگ، نیک دل حاکم
میاں، وہ شہر کہاں ہے جہاں کی بات ہے یہ

ہنسی خوشی سبھی رہنے لگے تھے۔۔۔یاد نہیں
بہت پرانی ، کسی داستاں کی بات ہے یہ؟





مصنف کے بارے میں


...

ادریس بابر

1974 - |


گوجرانوالہ پاکستان میں پیدا ہونے والے لکھاری نے انجینئرنگ یونیورسٹی لاہور سے الیکٹریکل انجینئرنگ کی. پہلا شعری مجموعہ "یونہی" ۲۰۱۲ میں شائع ہو سکا جسے فیض احمد فیض ایوارڈ سے نوازا گیا۔ اکادمی ادبیات پاکستان کے لیے پاکستانی ادب کے سالانہ انتخاب سمیت پاکستانی نظم کا ستر سالہ انتخاب مرتب کیا. مجلس ترقی ادب لاہور کے لیے اردو غزل کے ستر سالہ انتخاب کی تدوین کی. متعدد زبانوں اور اصناف میں شاعری آور تراجم کے ساتھ ساتھ بابر نے عشرے کی صنف متعارف کرائی جسے بطور خاص جدید ترین لکھنے والوں کی نسل میں قبول عام حاصل ہوا.




Comments